Wednesday, June 15, 2011

An leabhar is a luach!

Tharla mé i siopa leabhar i Leitir Ceanainn an lá faoi dheireadh, mé ag brabhsáil liom gan rud ar bith mór ar m'intinn.
Is maith liom cuairt a thabhairt ar shiopaí leabhar. Caitheamh aimsire ar dóigh atá ann. Is breá liom a bheith ag méarú fríd leabhair den uile chineál. Corruair tagaim abhaile agus beart beag liom, uaireanta eile fágaim agus mo dhá lámh chomh fada lena chéile.
Ar scor ar bith, bhí mé i mbun brabhsála cóngarach don chuntar nuair a chuala mé bean óg ag fiafraí d'fhear an scipéid an raibh leabhair Ghaeilge do pháistí aige. I mBéarla a chuir sí an cheist agus ba i mBéarla a freagraíodh í.
"I'm sorry, we don't. They're too expensive to keep in stock!"
Anois, bhí an fear sásta cibé rud a bhí uaithi a ordú, ach creidim nach raibh a fhios aici go díreach cad a bhí uaithi, go raibh sí ag iarraidh breathnú fríd réimse leabhar éagsúil agus ceann nó dhó a roghnú a d'fhóirfeadh do pháiste s'aici féin.
Chuir mé suim sa chomhrá beag seo. An é i ndáiríre go bhfuil praghas leabhair Ghaeilge ró-ard? Is dócha go bhfuil má tá siad ar na seilfeanna agat ar feadh míonna agus gan aon duine á gceannach.
Tá argóint ann atá cloiste agam go minic gur chóir d'ábhar i nGaeilge a bheith ar ardchaighdéan agus ar chomhchaighdéan lena bhfuil ar fáil i mBéarla agus gur chóir don phraghas a bheith tomhaiste dá réir. Más maith linn go mbeadh meas ag an phobal léitheoireachta ar leabhair Ghaeilge, caithfidh na foilsitheoirí iad féin luach ard a chur orthu.
Ar an lámh eile, seans go gceannófaí níos mó leabhair - leabhair do pháistí ach go háirithe - dá mbeadh siad ar fáil ag phraghas íseal. Déantar sin le leabhair Bhéarla go minic, iad sin atá imithe ón liosta sárdhíola nó atá i gcló le fada.
Níl fhios agam! Níl ann ach go dtéann mo chroí amach don bhean udaí ar mhaith léi an seans a bheith ag a páiste leabhar a léamh as Gaeilge ach nach bhfuair an fhaill sin i mbaile Leitir Ceanainn!

3 comments:

  1. Is dócha go bhfuil deacrachtaí i gceist le leabhair a choinneáil muna bhfuil an éileamh ansin fána choinne, ach cha bhfuair mise sa bhaile chéanna ach seilf bheag bhídeach san áit ar a thugtar Universal Books, agus is mór an caill an easpa Gaeilge litríochta i mbaile chomh mór le Leitir Ceanainn.

    ReplyDelete
  2. Smaoineamh fánach: uaireanta cuireann daoine luach níos mó ar an rud nach bhfuil ar fáil go héasca.

    ReplyDelete
  3. N'fheadar an é costas an leabhair féin a bhí i gceist nó an costas a bhaineann le hearra a bheith ag tógáil spáis agus gan mórán a bheith á dhíol. Agus é sin sa mhullach ar a dheacra is atá sé gnó a dhéanamh le Áis. Arís, is fadhb dáileadh & margaíochta atá ann.

    Leabhair do pháistí ach go háirithe, ba cheart margaíocht as Béarla & as Gaeilge a dhéanamh orthu - is minic iad á gceannach ag Béarlóirí mar bhronntanas do pháiste le Gaeilge (Gaelscoile & rl)

    ReplyDelete