Wednesday, June 24, 2009

Carda Poist

Tá muid i ndiaidh cúpla lá a chaitheamh sa Bhreatain Bheag. Bhí an aimsir galánta agus fuair muid an deis neart 'tour-áil' a dhéanamh.
I dTuaisceart na Breataine Bige agus sna 'Gleanntaí' is mo a chaith muid an cúpla lá. Tá an tírdhreach iontach anseo, na seirbhísí go seoigh, na daoine cairdiúil agus níor bhain aon tinneas nó timpiste do na páistí go fóill.
Thug muid cuairt ar Snowdon inné, chaith muid tamall ar an trá, thug muid cuairt (ghairid) ar Frongoch - ní mó suim a léirigh na páistí nó mo bheansa ann agus d'ith muid uachtar reoite faoi dhealbh David Llyod George i gCaernarfon.
Is iontach an méid Breatanais ata le cloisteáil á labhairt ag na daoine óga anseo. Páistí óga, déagóirí, daoine sna 20í. Ní bhfaighfeá in Éirinn é! Bhí muid ag ionad súgartha inné. Bhí Margaret agus Dan ag léimnigh thart, agus bhí ceathrar páiste ón Bhreatain Bheag ann fosta. Bhí an ceathrar eile ag spalpadh leo i mBreatanais agus bhí Margaret agus Dan ag caint eatarthu féin i nGaeilge.
Thosaigh ceann de na girseachaí ón Bhreatain Bheag ag labhairt le Margaret. Ní raibh mise nó Margaret bhocht ábalta bun ó barr a dhéanamh dá cuid cainte. Ba mhór an trua é. Rud inteacht faoi 'slide' a bhí a rá aici, sin an t-aon fhocal a thuig mé.
Cibé rud ata ar siúl ag lucht labhartha na Breatanaise, tá ag éirí leo. Tá a dteanga i bhfad níos beo nó mar atá teanga bheag muidne - de réir mar a chonaic mise ar scor ar bith!
Ag dul go Sasana inniu. Aimsir ghalánta tugtha don lá inniu fosta. Tá súil againn cuairt a thabhairt ar Stratford Upon Avon níos moille. Mothaím dáimh éigin le Shakespear... seans gur duine de mo chuid sinsear atá ann... Mac an Bhaird... Bard Avon...... thig liom a bheith ag brionglóidigh.......

2 comments:

  1. Tá Stratford go h-an dheas ach alán turasóirí ag triall air.Tá súil agam go mbainfidh sibh taithneamh as na laethanta saoire.

    ReplyDelete
  2. Go raibh maith agat, a Chlare. Ag baint an-sult as!

    ReplyDelete